Радасць і смутак. Зэльвенскія каталікі віншуюць святара і распачынаюць Трыдуум пасхальны

Апошнія тры дні Велікоднага посту называюць святым пасхальным Трыдуумам. Касцёл адзначае найбольшую таямніцу нашага адкуплення і ў асаблівых цэрэбрацыях успамінае ўкрыжаванне, пахаванне і змёртвыхпаўстанне Пана Езуса.

У дзень устанаўлення сакрамэнтаў Эўхарыстыі і Святарства парафіяне зэльвенскага касцёла Святой Тройцы сабраліся трошкі раней, каб падзякаваць настаяцеля святыні ксёндза Яцэка Маркеля за тое, што ён у свой час пачуў голас Бога і выбраў шлях служэння Пану. У віншавальным слове вернікі назвалі пробашча Настаўнікам, Дарадцам, Сябрам, які дапамагае шукаць правільнае выйсце са складанай сітуацыі, заўсёды падказвае, падтрымлівае добрым словам і парадай, які сваім прыкладам вучыць любіць Пана Бога, чуць Яго Слова, бачыць Святло Хрыста.

Вячэрняя імша Вялікага чацвярга – гэта пачатак святога пасхальнага Трыдуума, які вернікі будуць перажываць тры дні: чацвер, пятніцу і суботу.

–Усе тры дні – гэта найвялікшыя моманты хрысціянскай веры, – звярнуўся да вернікаў ксёндз Яцэк. – Гэта той час, калі мы перажываем за мукі і смерць Езуса. Таму трохдзённы перыяд аб’яднаны ў адзін  – літургічную цэлебрацыю, і яго неабходна правесці ў малітве, у разважанні.

Падчас літургіі каталікі ўзгадалі апошнюю вячэру Пана Езуса з апосталамі, калі Хрыстус устанавіў святыя сакрамэнты – Святарства і Эўхарыстыі. Затым гучна ў выкананні касцёльнага хору і хрысціян загучаў гімн «Хвала на вышынях Богу» і зазванілі званы: сімвалічна першы раз за ўвесь амаль саракадзённы ціхі велікодны перыяд. Пасля такога ўзрушанага моманту ўсё сціхла, вернікі сканцэнтраваліся на Таямніцы мукі і смерці Збаўцы.

З любоўю да нашага адзінага Айца прысутныя нізка схілілі галовы ў час перанясення Найсвяцейшага Сакрамэнту ў спецыяльна падрыхтаванае месца, якое сімвалізуе цямніцу, у тое месца, дзе Езус будзе перажываць мукі. Разам са святаром адгаварылі малітву.

• 

На працягу Вялікай пятніцы, калі Езус будзе ісці апошняй сваёй дарогай,  Крыжовым шляхам, касцёл будзе адчынены для таго, каб кожны жадаючы мог прыкланіцца перад цямніцай і ў цішыні памаліцца перад Сакрамэнтам.

Літургія, у якой будуць узгадвацца мукі Пана, распачнецца вечарам, у 18 гадзін. Падчас імшы адбудзецца адарацыя святога Крыжа не праз пацалунак, як было раней, а ў сувязі з пандэміяй каранавіруса – праз нізкі паклон.

Людміла ПОПКА

Интересные и актуальные новости Зельвенского района в нашем Telegram-канале. Подписывайтесь по ссылке!