Дзiцячы сад вёскi Вострава дапамагае зiмуючым птушкам

Зіма – цяжкі час для птушак, асабліва калі яна халодная, снежная. Галодныя птушкі моцна пакутуюць ад холаду. Многія з іх прылятаюць бліжэй да жылля чалавека, быццам чакаюць тут паратунку ад марозаў і бяскорміцы. Дапамагчы зімуючым птушкам можа кожны чалавек.

• 

У нашай дашкольнай установе прайшла экалагічная акцыя “Птушыная сталовая”. Бацькі з задавальненнем адгукнуліся на прапанову і разам з дзецьмі на час сталі архітэктарамі, будаўнікамі і дызайнерамі. Усе кармушкі былі выраблены з “душой” і з экалагічна чыстых матэрыялаў.

З якім гонарам і задавальненнем прыносілі дзеці свае тварэнні ў дзіцячы садок. Кожны хацеў падзяліцца ўражаннямі аб тым, як тата даверыў яму малаток, як з мамай ўпрыгожвалі кармушку. Неаднойчы было сказана: “Гэта зрабілі мы з татам і мамай!”… Сапраўды, вельмі прыемна дапамагчы даросламу ў такой сур’ёзнай справе.
І кармуші выйшлі арыгінальныя: незвычайных форм, памераў і афарбовак. Што і казаць – фантазію дзеці і іх бацькі праявілі на ўсе сто працэнтаў. Актыўны ўдзел прынялі сем’і Дзішко, Войцік, Лазоўскія, Лукашэвіч, Шчаюк, Шарсцянкіны, Шышко.

• 

Развесілі кармушкі на гульнявой пляцоўцы дзіцячага садка. Рады птушыным сталовым не толькі птушкі, але і дзеці: насыплюць корм і з нецярпеннем чакаюць гарэзлівых сінічак, снегіроў, амялушак, а затым доўга з радасцю цікуюць за птушачкамі. Дзеці і дарослыя зразумелі, што робяць добрую справу, дапамагаючы выжыць маленькім крылатым сябрам у самую цяжкую пару года. І назвалі акцыю ўрокамі дабра, якога так не хапае ў нашым жыцці.

Па завяршэнні ўсе дружна вырашылі акцыю паўтараць штогод: гэта абавязкова прынясе карысць прыродзе і дзецям, якія вучацца клапаціцца аб ёй. І хочацца выказаць надзею, што больш стане звонкіх спеваў каля нашых дамоў, а свет, у якім мы жывем, стане дабрэйшым.

С. Бурак

Интересные и актуальные новости Зельвенского района в нашем  Telegram-канале. Подписывайтесь по ссылке!