Растуць надоiі на добрай траве

Адзін з адказных перыядаў у жывёлагадоўлі – пашавы. Надоі, як правіла, высокія на тых фермах, дзе выпас грамадскага статка вядзецца належным чынам. Гэта добра засвоілі жывёлаводы СВК “Караліно”. – Сёлета на пашу, перазалужаную і падкормленую азотам, мы вывелі чатыры гурты, – расказвае галоўны заатэхнік гаспадаркі Міхаіл Русак. – Паша размяшчаецца непадалёку ад фермаў, таму на ноч каровы вяртаюцца ў свае стойлы.Адзін гурт выпасаецца кругласутачна. Акрамя зялёнага корму дойны статак атрымлівае канцэнтраты. Пасля выхаду кароў у поле сярэднясутачныя надоі паступова сталі павялічвацца і зараз складаюць 14,2 кг. А гэта ўжо амаль адзін кілаграм прыбаўкі ў параў-нанні са стойлавым перыядам. На ферме “Караліно”, напрыклад, у суткі ў сярэднім прыбаўляецца па 2,8 кг. Штодзённа гаспадарка прадае дзяржаве больш за 15 т малака. Таварнасць прадукцыі складае 99,6 працэнта. 76 працэнтаў здадзенага малака адпавядаюць вышэйшаму гатунку. Для больш эфектыўнага выкарыстання сакавітай травы на ўсіх фермах арганізаваны франтальны выпас кароў загонна-парцыённым спосабам з выкарыстаннем электрапастуха. На кантролі і іншыя пытанні: замацаванне тэхнікі для падвозу вады, назначэнне адказных за своечасовае падкошванне травастою. Разам з галоўным спецыялістам заатэхнічнай службы гаспадаркі мы наведалі каралінскую малочнатаварную ферму. Пасля ранішняй дойкі пастухі-даглядчыкі на выгульным двары сфарміравалі жывёлу ў гурт і накіравалі на пашу. – Надоі залежаць не толькі ад пажыўнага корму, – расказвае загадчыца фермы Алена Шэйка,– але і ад правільнай арганізацыі выпасу жывёлы. З 5 гадзін раніцы каровы ўжо ў полі. У 10.30 пачынаецца ранішняя дойка, пасля якой жывёлу зноў выганяем на пашу. Вячэрняя дойка праходзіць у 20.00. Такога распарадку прытрымліваемся штодзённа. Пастухі ўважліва сочаць за тым, каб статак быў забяспечаны вадою, соллю і мінеральнымі дабаўкамі. Акрамя таго, на пашы ёсць яшчэ невялікая сцірта сена. Сёлета гаспадарка плануе павялічыць рост валавой прадукцыі. Каб гэтага дасягнуць, неабходна прыкласці максімум намаганняў усім вытворчым аддзяленням. Віктар МАКОЎСКІ.