Без присмотра не будет роста

Не спадае працоўнае напружанне на палях гаспадарак раёна. Завяршыўшы сяўбу, земляробы вядуць догляд азімых і яравых культур. Сухое і цёплае надвор’е, якое стаіць цяпер, спрыяе развіццю пустазелля і шкоднікаў. Ад іх неабходна своечасова пазбавіцца, каб стварыць аптымальныя ўмовы для росту і развіцця культур на пачатковых стадыях развіцця. Дасягаецца гэта шляхам выканання шырокага комплексу арганізацыйных і агратэхнічных мерапрыемстваў. І дзе гэтыя работы праводзяцца своечасова, там заўсёды застаюцца ў выйгрышы – пасевы хутка развіваюцца, набіраюць сілы.

 У вызначаныя тэрміны і на высокім узроўні вядуць догляд пасеваў земляробы філіяла “Князева”. У мінулым годзе правільная стратэгія да-зволіла хлебаробам значна павялічыць ураджайнасць сельскагаспадарчых культур. 

– Усе тэхналагічныя аперацыі важна праводзіць правільна і своечасова, – адзначае намеснік дырэктара філіяла па раслінаводстве Дзяніс Тамкевіч. – Для гэтага мы цесна супрацоўнічаем з навукоўцамі і прадстаў-нікамі буйных аграпрамысловых фірм. Яны рэгулярна бываюць у нас і дапамагаюць укараняць у практыку ўсё лепшае  і перадавое.

У гаспадарцы другая падкормка азімых зерневых праведзена на плошчы 1610 гектараў (77 % да плана), азімага рапсу – 180 га (29%), цукровыя буракі апрацаваны на 400 гектарах (100%), яравыя зерневыя – на 920 гектарах. Рэтардантамі (рэгулятарамі росту) азімыя культуры апрацаваны на плошчы 835 га, фунгіцыдамі (супраць грыбковых захворванняў) – 620 га і інсектыцыдамі (супраць шкоднікаў) – на 630 га.

У час нашага наведвання гаспадаркі на буракавічнай плантацыі, размешчанай паміж вёскамі Падбалоцце і Крамяніца, пасля хімпраполкі вялася выбарачная апрацоўка пасеваў супраць пырніку. Выконваў гэту тэхналагічную аперацыю на новым самаходным апырсквальніку “Раса” малады механізатар Аляксей Заяц. Дакладна працаваць на вызначаных плошчах і захоўваць шчыльную стыкоўку палосаў дапамагае спадарожнікавы навігатар, таму агрэхаў за апырсквальнікам не застаецца. Спецыяльныя пнеўмаколы дазваляюць уносіць прэпараты нават на тых палях, дзе не пройдзе іншая тэхніка, а малы ціск на глебу не пашкоджвае расліны. “Раса” карыстаецца попытам у мясцовых земляробаў і сёлета тут набылі яшчэ адну. За выкананнем агратэхнічных работ на  гэтым полі кантроль ажыццяўляе вядучы аграном па абароне раслін Уладзімір Жыдок. Пры неабходнасці, уносіць карэктывы ў работу меха-нізатара  і самаходнага  апырсквальніка. 

На хімічнай апрацоўцы пасеваў задзейнічаны яшчэ адзін самаходны апырсквальнік “Раса” і трактары з прычэпнымі штангавымі апырсквальнікамі “Мекасан-2500” і “Калумбія    АД-18”, на якіх працуюць Анатоль Шчылік, Станіслаў Лудзіч і Яўген Гогалеў. На мінулым тыдні прыступілі да хімпраполкі кукурузы. 

Механізатары Станіслаў Ленец і Уладзімір Яткоўскі праводзяць другую падкормку азімых зерневых карбамідам.

На ўсіх палях, дзе мы пабывалі, бачна ўмелая арганізацыя працы і належны кантроль за тэхналагічнымі аперацыямі з боку агранамічнай службы.