Добрым спецыялістам будзем рады! На Зэльвеншчыне прайшлі сустрэчы са студэнтамі аграрнай ВНУ

У сельскагаспадарчых прадпрыемствах раёна адбыліся сустрэчы са студэнтамі Гродзенскага аграрнага ўніверсітэта. Будучыя ветурачы наведалі сельгаскааператыў “Сынкавічы”, пабывалі ў дзяржпрадпрыемстве “Галынка”. Па меркаванні прадстаўнікоў упраўлення сельскай гаспадаркі і харчавання райвыканкама, такія мерапрыемствы дапамагаюць гаспадаркам прыцягваць маладыя кадры, а студэнтам – вызначыцца з першым працоўным месцам.

Госці даведаліся, што ў экалагічна чыстым Зэльвенскім раёне з яго развітай сацыяльнай інфраструктурай функцыянуюць 6 сельскагаспадарчых прадпрыемстваў, дзе для працы спецыялістаў раслінаводчай і жывёлагадоўчай галін створаны камфортныя ўмовы. Як адзначыла галоўны спецыяліст упраўлення Алена Антановіч, у эканоміцы Зэльвеншчыны значны ўклад ўклад робяць аграрыі: большасць прадукцыі вырабляецца на прадпрыемствах. У гэтым пераканаліся студэнты, калі сустрэліся з намеснікамі кіраўнікоў СВК “Сынкавічы” і дзяржпрадпрыемства “Галынка”.

– З году ў год работнікі АПК дэманструюць уменні эфектыўна і з аддачай працаваць. Дзякуючы багатаму вопыту, прафесіяналізму, падыходам, што прымяняюцца ў аграпрамысловым комплексе Зэльвеншчыны, і перадавым тэхналогіям дадзеныя гаспадаркі па шэрагу паказчыкаў атрымліваюць рэкордныя вынікі, у тым ліку ў вобласці і рэспубліцы, – канстатавала Алена Валер’еўна.

Пасля такіх слоў студэнтам было цікава пазнаёміцца з МТК “Елка”. Сённяшнім студэнтам не толькі паказалі сам працэс малочнай вытворчасці, але і адказалі на актуальныя пытанні. Галоўны заатэхнік СВК “Сынкавічы” Надзея Сарока ахвотна падзялілася напрацоўкамі, прадэманстравала магчымасці сучаснага праграмнага забеспячэння ў вырошчванні дойнага статку.

У сваю чаргу выконваючы абавязкі намесніка дырэктара па ідэалагічнай рабоце дзяржпрадпрыемства “Галынка” Ілля Яфімаў адзначыў, што рэалізаваць сябе можна і ва ўмовах сельскай мясцовасці. З поўным усведамленнем таго, што паказчыкі арганізацыі напрамую залежаць ад забяспечанасці кваліфікаванымі кадрамі, расказаў аб шматлікіх яе дасягненнях за перыяд існавання.

– Шчыра спадзяюся, што, закладваючы ўраджай 2024 года, мы выканаем усе тэхналагічныя патрабаванні і з гонарам завяршым жніво, – зазначыў Ілля Эдуардавіч.

Далей шлях студэнтаў ляжаў на МТК “Івашкавічы”, за час знаходжання на якім яны ўпэўніліся, што ўсе аграрыі, без дзялення на земляробаў і жывёлаводаў, зацікаўлены ў якаснай уборцы ўраджаю. Фактычна і работнікі фермаў цяпер трымаюць сапраўдны экзамен на прафесіяналізм

На наступны дзень моладзь віталі ў філіяле “Міжэрэчы”, ветстанцыі. Госці занатавалі наступнае: штомесячныя даплаты ад 8 да 20 базавых велічыняў на працягу 4 гадоў атрымліваюць маладыя спецыялісты пры заключэнні мэтавых дагавораў з прадпрыемствамі раёна. Тым больш, што сёння ў арганізацыях патрэбны кваліфікаваныя аграномы, энергетыкі, ветэрынары, заатэхнікі і механізатары. Увогуле, некаторыя з юнакоў і дзяўчат у будучым плануюць папоўніць рады аграрыяў Зэльвеншчыны.

Любоў ШЭЙКА

Интересные и актуальные новости Зельвенского района в нашем Telegram-канале. Подписывайтесь по ссылке!