Дорожим и гордимся

Цёплай выдалася сустрэча работнікаў Славаціцкай сельскай бібліятэкі-музея этна-графіі і мясцовага СДК з удзельніцай вайны Ганнай Іванаўнай Баглай з в.Запруддзе.

Калі пачалася вайна, ёй было ўсяго 16 гадоў. Жанчына да дробязей памятае жудасныя карціны тых дзён, калі ў вёсцы з’явіліся фашысты і пачалі адна за адной адбывацца страшэнныя падзеі. На фронце была медыцынскай сястрой. Колькі разоў ёй даводзілася выратоўваць люд-скія жыцці. Разам з іншымі партызанамі не раз прымала ўдзел у баявых дзеяннях, калі пускалі пад адхон цягнікі з варожай тэхнікай, бралі ў палон нямецкіх салдат, дабывалі важныя звесткі. За свой гераізм узнагароджана медалямі “За перамогу над Германіяй”, “За перамогу над Японіяй”.

У мірны час Ганна Іванаўна працавала ў калгасе “Шлях Леніна”, заўсёды была ў ліку лепшых работнікаў. А якая яна рукадзельніца! Вышытыя ёю ручнікі ды навалачкі і зараз радуюць вока кожнага, хто завітае ў яе дом. Мясцовыя жыхары гавораць у адрас жанчыны толькі добрыя словы: у жыцці Ганна Іванаўна першай прыходзіла на дапамогу тым, хто меў у гэтым патрэбу. 

Сустрэча пакінула ў душы глыбокі след. У чарговы раз пераканаліся, што менавіта ў такіх людзей з моцным характарам трэба вучыцца мужнасці, смеласці і патрыятызму. Людзі, якія прайшлі вайну, добра ведаюць, як трэба жыць, сябраваць, пераадольваць цяжкасці. Да іх слоў варта прыслухацца.