«Эпицентр» творчества

Сёння культура цалкам увайшла ў наша жыццё. Асабліва не задумваючыся, мы карыстаемся яе здабыткамі: ходзім на канцэрты і паказы кіно, наведваем бібліятэкі, аддаём сваіх дзяцей у школы мастацтваў. За “кулісамі” ўсяго гэтага стаяць людзі, якія працуюць, калі мы адпачываем у святы, падымаюць нам настрой і вучаць тонка адчуваць свет…

Напярэдадні прафесійнага свята аб асаблівасцях культурнага жыцця Зэльвеншчыны карэспандэнту “Працы” расказала дырэктар раённага метадычнага цэнтра народнай творчасці Святлана ЯКУТА. Дарэчы, з нагоды свята яна ўзнагароджана Ганаровай граматай райвыканкама.

– Святлана Пятроўна, раскажыце пра асноўныя накірункі дзейнасці метадычнага цэнтра.

– Сёння метадычная служба бачыць сваю задачу ў тым, каб удасканаліць работу ўстаноў культуры, развіваць творчыя здольнасці культработніка, стымуляваць у ім жаданне не паўтарацца, а шукаць новае.  З гэтай мэтай метадысты наведваюць установы, уносяць прапановы, выступаюць у якасці выканаўцаў і вядучых розных мерапрыемстваў.

Як адны з накірункаў – развіццё аматарскай творчасці, адраджэнне традыцыйнай культуры, рэалізацыя прыярытэтных задач дзяржаўнай культурнай палітыкі, пад-трымка творчых ініцыятыў.

– Крыху статыстыкі: што ўяўляе сабой РМЦНТ, які  можна назваць каардынатарам культурнага жыцця Зэльвеншчыны?

– Гэта складаны арганізм, які пастаянна развіваецца. Сёння культурныя патрэбы зэльвенцаў задавальняюць 17 устаноў клубнага тыпу, дзіцячая школа мастацтваў, аўта-клуб, культурна-забаўляльны цэнтр “Феерыя”, які быў ад-крыты летам. 

– А падрабязней…

– Дзейнічае 137 клубных фарміраванняў, з іх 78 для дзяцей – у іх займаецца 1300 чалавек. Лічба немалая, тым больш, што раён у нас невялікі. Асаблівай папулярнасцю карыстаецца вакальна-харавы жанр – у 40 гуртках за-дзейнічаны 370 чалавек. Не менш актуальны і заняткі дэкаратыўна-прыкладнога мастацтва. У 15 гуртках гэтага накірунку налічваецца больш за сотню дзяцей і дарослых.

Каб народ не сумаваў і для росту прафесійнага майстэрства калектываў аматарскай творчасці арганізуюцца масавыя мерапрыемствы,  тэатралізаваныя святы, абрады, прадстаўленні, у тым ліку і на платнай аснове. 

– Зараз дзяржава ўдзяляе вялікую ўвагу зберажэнню аб’ектаў гісторыі, архітэктуры, археалогіі, якія ўяўляюць каштоўнасць і могуць у далейшым стаць турыстычнымі аб’ектамі. Якая роля ў гэтай справе адводзіцца культработнікам?

– Спецыялістамі цэнтра вядзецца сур’ёзная работа па вывучэнні гісторыка-культурнай спадчыны.  Шмат намаганняў прыкладзена імі, каб у Дзяржаўны спіс нематэрыяльных гісторыка-культурных каштоўнасцей былі занесены 29 аб’ектаў Зэльвеншчыны.

– Сёння да сферы культасветработы прад’яўляюць высокія патрабаванні, якія прымушаюць шукаць нетрадыцыйныя падыходы да распрацоўкі методыкі і арганізацыі дзейнасці ўстаноў культуры…

– Так, перад клубнымі ўстановамі, у тым ліку і сельскімі, стаіць шэраг задач. Галоўная – арганізацыя змястоўнага адпачынку розных катэгорый насельніцтва. У сувязі з гэтым укараняюцца цікавыя формы работы, якія, як паказвае жыццё, падабаюцца нашым людзям. Гэта і святы вёсак, вуліц, калектыўных дзён адпачынку, дзе прысутныя знаёмяцца з гісторыяй свайго краю, з вырабамі народных майстроў. Плённа ў гэтым накірунку працуюць Дзярэчынскі ЦДК, Галынкаўскі, Дабраселецкі, Чырванасельскі СДК, Бародзіцкі цэнтр культуры і вольнага часу.

Штогод распрацоўваюцца графікі канцэртнага абслугоў-вання жыхароў вёсак, дзе няма стацыянарных клубных устаноў. Традыцыйнымі сталі творчыя справаздачы аматарскіх калектываў мастацкай творчасці сельскіх устаноў культуры.         

– Скажыце, якія формы работы зараз найбольш папулярны?

– Як і заўсёды – дыскатэкі і канцэрты. Робім усё магчымае, каб нашы дыскатэкі былі больш цікавымі і насычанымі,  каб прыцягнуць на іх моладзь. Канцэртныя праграмы таксама ўдасканальваюцца. Поўны зал гледачоў быў на конкурсе мастацкай самадзейнасці сярод арганізацый і ўстаноў, які ў гэтым годзе ўпершыню прайшоў у пасёлку. Папулярны і традыцыйныя святы: Каляды, Масленіца, Купалле, Дажынкі.

– Удзелам у якіх мерапрыемствах можаце пахваліцца?

– Кожны год калектывы мастацкай творчасці ўдзельнічаюць ва Усебеларускім фестывалі нацыянальных культур, фестывалях “Не старэюць душой ветэраны”, дзіцячай эстраднай творчасці “Масты надзей”, абрадаў і рамёстваў “Скарбы Гродзеншчыны”, конкурсе вядучых канцэртных праграм. Арганізацыя Ганненскага кірмашу, абласнога фестывалю “Новае пакаленне”, конкурсу рэгіянальнага фальклору “Сустрэчы ў “Верасе” не абыходзіцца без спецыялістаў метадычнага цэнтра.

– А чым ганарыцеся?

– Наш гонар – 8 калектываў, якія  носяць званні народны і ўзорны. Яны вядуць актыўную канцэртную дзейнасць і за межамі раёна.