Гісторыя Дзярэчына выклікае цікавасць у землякоў. І яе трэба ведаць

Амаль пяць гадоў прайшло з таго дня, як адкрыўся музейны пакой, прысвечаны знакамітым асобам дзярэчынскай зямлі. З тае пары яго заснавальнік Генадзь Коўш працягвае пошукі, дапаўняе і папаўняе выставы новымі экспанатамі. Аповед і гісторыя музея выклікае цікавасць як у школьнікаў, так і старэйшага пакалення. Слухачамі на гэты раз сталі наведвальнікі аддзялення забеспячэння дзённага знаходжання для людзей сталага ўзросту ЦСАН Зэльвенскага раёна.

Генадзь Вікенцьевіч прывёў падрабязныя гістарычныя звесткі пра мястэчка: першыя аддаленыя згадкі з’яўляюцца ў 1385 годзе, аднак за аснову ўзяты 1410 год, калі Вялікі князь Вітаўт пісьменнай граматай перадаў Дзярэчын пану Васілю Копачу за верную службу. Далей – аб яго ўладальніках князях Палубінскіх і Сапегах, іх ролі ў развіцці Дзярэчына. Турысты даведаліся аб каштоўнасцях, што знаходзіліся ў палацы, экспанатах, якія ўдалося раздабыць, аб архітэктурных шэдэўрах тых часоў, багатай бібліятэцы і карціннай галерэі, гандлёвых шляхах і г.д.

Музей за апошнія гады пашырыўся пакоямі мэблі і рэчаў 20-50 гадоў былога стагоддзя. Тут цікавыя куфры, крэслы, стол, прадметы побыту і нават элементы жаночых упрыгажэнняў. Дарэчы, рэстаўрацыяй і аднаўленнем ўсяго здабытага займаецца сам Генадзь Вікенцьевіч. Вялікую спонсарскую і матэрыяльную дапамогу аказвае дырэктар дзяжпрадпрыемства «Галынка» Яўген Грэцкі.

Асобны пакой аздоблены партрэтамі вядомых асобаў – Ц.Ліпінскага, Л.Патоцкага, М.Цяплінскага, І.Макея, Я.Пятроўскага, І.Карскага і інш., якія ўнеслі значны ўклад у развіццё розных галін дзейнасці. Тут знайшлося месца знакамітым і славутым песнярам слова і музыкі У.Плюце і П.Марціноўскаму, акцёру І.Мацкевічу, навукоўцу П.Сцяцко. Багаты матэрыял сабраны і аб паэтах-земляках, удзельніках літаратурнага клуба “Зоры над Зальвянкай”. Да гэтай творчай суполкі належыць і Г.Коўш.

У год 80-годдзя вызвалення Беларусі ад нямецка-фашысцкіх захопнікаў краязнаўца ўзгадаў пра падзеі мінулай вайны, расказаў пра землякоў, якія ўдзельнічалі ў партызанскім руху, пра гета, у якім было застрэлена больш за 3000 яўрэяў.

Пасля завяршэння экскурсіі людзі сталага ўзросту спыніліся ля помніка загінуўшым дзярэчынцам і ўшанавалі памяць аб вызваліцелях хвілінай маўчання.

Больш падрабязны матэрыял будзе надрукаваны ў газеце “Праца”.

Людміла ПОПКА

Интересные и актуальные новости Зельвенского района в нашем  Telegram-канале.  Подписывайтесь по ссылке!