Разносіцца гаворка: загучалі сельскагаспадарчыя падворкі
Пакаштаваць мясцовыя нацыянальныя прысмакі, паслухаць вясёлую музыку і патанцаваць, пазнаёміцца з зэльвенскімі абрадамі і легендамі, пагуляць на цікава аформленых пляцоўках і зрабіць фота на памяць у розных фотазонах – усё гэта гасцям Ганненскага кірмашу прапаноўвалася на падворках сельсаветаў і сельгасарганізацый. Па традыцыі імправізаваныя сядзібы размясціліся ўздоўж вуліцы Перамогі.
Як толькі сонца засвяціла ярчэй, з падворкаў стала даносіцца музыка і распаўсюджвацца прыемны пах вясковых страў. Так музыкі – работнікі ўстаноў культуры – рыхтаваліся да сустрэчы гасцей, як тутэйшых, так і прыезджых. Ім дапамагалі прадстаўнікі сельвыканкамаў і сельгаспрадпрыемстваў, а таксама моладзь, якая пражывае на тэрыторыі сельсаветаў і якой цікавы фальклор. Кожны падворак здалёк вабіў сваёй адметнасцю. Так, напрыклад, хацелася хутчэй заглянуць на падворак “Князеўскія выдрымусы” (філіял «Князева» і Крамяніцкі сельсавет), на якім адзін з куткоў сядзібы быў упрыгожаны апетытнымі хатнімі каўбасамі, салам і вяндлінай. Аж у носе казытала ад страў, пастаўленых на стол: розныя выдрымусы з бульбы, ураджаем якой з года ў год славіцца князеўскі край.
Багатай фантазіяй вылучыліся гаспадары падворка “Бародзіцкі карагод” (сельгаспрадпрыемства «Бародзічы», Зэльвенскі сельсавет). Іх брэнд – салодкія клубніцы і тлустае малако. Тут можна было паспрабаваць кулінарныя вырабы, у якіх прысутнічала ягада, і запіць кактэйлем на яе ж аснове.
Елкаўчане ўразілі тым, што прыгатавалі стравы з мёду, яблыкаў і арэхаў, такім чынам адлюстравалі жнівенькія тры Спасы. Больш таго, усе дары прыроды вельмі цікава аздобілі. І нават прыдумалі варажбу на арэхах, чым зацікавілі не аднаго госця свята. А вось назва падворка «Елкаўская заманіха» (СВК «Сынкавічы» і Сынкавіцкі сельсавет) адпавядавала яго афармленню (шмат прывабных зон, у тым ліку і фотазон).
Калі ж гаварыць аб стылізацыі “мястэчкаў”, то кожнае было па-свойму адметнае. Але ж гаспадары не забылі аб старадаўніх беларускіх традыцыях – кожная сялянская хата была ўпрыгожана ярка вышытымі ручнікамі, тканымі дыванамі, у кутку размяшчаўся абраз, а на стале – каравай.
Дарэчы, калі надышоў час наведвання падворкаў членамі журы, то многія гаспадары сустракалі паважаных гасцей хлебам з новага ўраджаю.
Калектывы пазнаёмілі журы з фальклорнымі абрадамі і легендамі, адметнасцямі сваёй мясцовасці, пачаставалі прысмакамі. А некаторыя, як напрыклад, на падворку “Галынкаўская талака” (сельгаспрадпрыемства «Галынка», Галынкаўскі, Дзярэчынскі і Каралінскі сельсаветы) разыгралі цэлае дзейства.
Сваю задумку ўдала перадалі і “Дабраселецкія ўладары” (філіял «Дабраселецкі» і Дабраселецкі сельсавет), якія змайстравалі крынічку, падобную той, што цячэ каля вёскі Зенькаўцы.
Журы і гледачоў вабілі абрады, танцавальныя і канцэртныя праграмы, а таксама бяспройгрышная латарэя. Словам, на кожным падворку за сімвалічную плату можна было нешта выйграць. А на князеўскім нават разыгрываўся жывы гусь. Жадаючых было нямала: усе 50 білетаў хутка раскупілі. У выніку шчасліўчыкамі сталі ўладальнікі білетаў №№ 22 і 32. Сям’я Кайрыс з Мінску (карані зэльвенскія) атрымала ў падарунак птушку, а Вераніка Янучак з Зэльвы – прыгожую драўляную скульптуру каня.
Пры падвядзенні агульных вынікаў было некалькі намінацый. У “Лепшым падвор’і” перамогу атрымаў “Бародзіцкі карагод”. Страву-прызёр згатавалі гаспадары з Дабраселецкага падворка. Заслужыла высокай адзнакі і мастацкае афармленне падворка “Галынкаўская талака”. “Елкаўская заманіха “ перамагла музычным афармленнем. А за захаванне мясцовых традыцый прыз атрымалі князеўцы.
Людміла ПОПКА
Цікавыя і актуальныя навіны Зэльвенскага раёна на Telegram-канале!
Комментарии отключены