Культура и туризм: опыт и новации

На базе клубных устаноў і аграсядзіб Зэльвен-скага раёна прайшоў абласны семінар для дырэктараў раённых метадычных цэнтраў народнай творчасці і Дамоў культуры. Яго арганізатарам выступіў Гродзенскі абласны метадычны  цэнтр народнай творчасці.

Семінар-практыкум сабраў больш за 40 удзельнікаў. У працэсе работы яны пазнаё-міліся з вопытам работы зэльвенскіх калег, атрымалі карысныя веды і навыкі для сваёй творчай працы.

Два вучэбныя дні, якія прайшлі пад назвай “Узаема-дзеянне клубных устаноў з аграсядзібамі рэгіёна”, былі насычанымі і пазнавальнымі.

У першы дзень удзельнікі семінара змаглі пазнаёміцца з сацыяльна-эканамічным развіццём Зэльвенскага раёна,  яго багатай спадчынай і традыцыямі, якія на працягу доўгіх гадоў перадаюцца з пакалення ў пакаленне. Работнікі культуры вобласці наведалі Елкаўскі сельскі Дом культуры, раённы Дом рамёстваў, культурна-забаўляльны цэнтр “Феерыя”. Не пакінулі нікога раўнадушным цудоўныя жывапісныя краявіды Зэльвеншчыны і адзін з аб’ектаў архітэктурнай гісторыка-культурнай спадчыны – царква святога Архангела Міхаіла ў Сынкавічах. Захапілі каларытныя работы народных майстроў, разнастайныя вырабы кіраўнікоў і ўдзельнікаў гурткоў і аматарскіх аб’яднанняў. Асаблівае ўражанне склалася ад знаёмства з гаспадарамі і наведвання аграсядзібаў.
Удзельнікі семінара сумесна з уладальнікамі аграэкатурыстычных аб’ектаў абмяркоўвалі агульнае пытанне: як заціка-віць і прывабіць турыста ў свой рэгіён, каб у баку не засталіся ні ўстановы культуры, ні аграсядзібы. На прыкладзе фермерскай гаспадаркі “Верас” удзельнікі семінара па-знаёміліся з каардынацыяй работы і ўзаемадзеяннем паміж раённай і сельскімі ўстановамі культуры і аграсядзібай. Прысутным быў прадстаўлены вясельны абрад, як адна з форм супрацоўніцтва. Аграсядзіба “Сярэбраны ручай” стала сцэнічнай пляцоўкай для паказу абраду апрацоўкі льну ўдзельнікамі ўзорнага аматарскага аб’яднання “Кашалёўская скарбонка”.

Не сакрэт, што сёння беларускага (асабліва гарадскога) і замежнага турыста вабяць цішыня, утульнасць, лясны масіў, сялянскі побыт. Усё гэта цалкам можна знайсці на тэрыторыі аграсядзібы. А вось зрабіць адпачынак запамінальным, як гавораць, дадаць “изюминку”, пад сілу работнікам культуры. Яны могуць арганізаваць паказ любога абраду па жаданні заказчыка. Сёння ўнікальнымі турпрадуктамі ўстаноў культуры нашага раёна з’яўляюцца такія абрады, як сустрэча маладых, хрэсьбіны, Купалле, Калядкі і Ражство. Цікавасць у турыстаў выклікаюць майстар-класы і народныя гулянні, дэгустацыя страў нацыянальнай кухні. Гаспадар “Сярэбранага ручая” Аляксандр Рожка напаіў завітаўшых да яго гасцей з вобласці духмяным травяным настоем і пачаставаў мёдам рознага гатунку.

На тэрыторыі Зэльвенскага раёна яскрава вырысаваўся турыстычны маршрут, які прадугледжвае не толькі наведванне аб’ектаў гісторыка-культурнай спадчыны, але і паказ установамі культуры ані-мацыйных праграм. У выніку адпачывальнікі не толькі забываюць пра гарадскую мітусню, але на свае вочы знаёмяцца з беларускім краязнаўствам. Адзін з аб’ектаў экалагічнага турыстычнага маршруту – аграсядзібу “Старая Весь” – наведалі і ўдзельнікі семінара. Гаспадар Сяргей Мікановіч расказаў, што адметнае на яго аграсядзібе знаходзяць турысты. Не менш цікавае выступленне падрыхтавала і дырэктар раённага Дома рамёстваў Ала Сідорык. Культурныя праграмы гэтай установы заўсёды выклікаюць цікавасць у гасцей Зэльвеншчыны.

Не менш насычаным па змесце быў і другі дзень. Значную ролю ў прыцягненні турыстаў, безумоўна, адыгрываюць сельскія ўстановы культуры. Таму ўдзельнікам семінара было цікава даведацца, як гэта пытанне вырашаецца ў суседніх установах культуры. Захапляльную прэзентацыю падрыхтавала намеснік начальніка аддзела ідэалагічнай работы, культуры і па справах моладзі Гродзенскага райвыканкама Наталля Рамановіч. Яна падзялілася напрацоўкамі Гродзенскага раёна па ўзаемадзеянні ўстаноў культуры з аграсядзібамі. Так, адраджэнне абрадавай традыцыі выпечкі дамашняга хлеба, тэхналогія прыгатавання мясцовых традыцыйных страў прывялі да патоку турыстаў з розных гарадоў Беларусі, а таксама бліжняга замежжа. Для гасцей культработнікі арганізоўваюць майстар-класы па танцы, размалёўцы яек, народныя гульні і праграмы. А рэкламуюць сваю дзейнасць работнікі ўстаноў культуры праз каляровыя, ілюстраваныя інфармацыйныя буклеты.

Расце попыт на агратурызм у Лідскім і Свіслацкім раёнах. Сюды прыязджаюць, каб адзначыць дзень нараджэння, прафесійныя святы, вяселле. Таму работнікі ўстаноў культуры пастараліся аднавіць некаторыя абрады, характэрныя толькі для іх мясцовасці. Замежныя госці ў захапленні ад нематэрыяльнай гісторыка-культурнай спадчыны беларусаў. У дадатак да забаўляльнай праграмы – сувенірная прадукцыя. Свае паслугі прапануюць праз рэкламныя ролікі.

Пры падвядзенні вынікаў работы семінара былі адзначаны не толькі станоўчыя моманты ўзаемадзеяння ўстаноў культуры з гаспадарамі аграсядзіб, але і акрэслены праблемныя пытанні, на вырашэнне якіх неабходна звярнуць увагу ў далейшым супрацоўніцтве.