“Купалле-2024”, або Як у Зэльве купальскую ночку віталі ды спадчыну шанавалі

Штогод 6 ліпеня святочныя дзеі вабяць на бераг вадасховішча ў райцэнтры нямала аматараў славянскай культуры. “Каб не ведалі ў жыцці гора і ліха, а шчасце было вялікім,” – гэту ідэю старадаўняга свята Івана Купалы ў чарговы раз дапамагла адлюстраваць абраная лакацыя, зрабіць яго больш аўтэнтычным. “Купалле – 2024” зэльвенцы адзначылі пошукам кветкі папараці і развядзеннем агню.

Цікавасць шматлікіх прысутных выклікалі “Купальскія прыгоды”. Менавіта такую яскравую назву далі тэатралізаванаму прадстаўленню арганізатары – работнікі цэнтра народнай творчасці і культуры. Траўніца і Купала вялі рэй на цудоўным свяце, удзельнікі – юнакі і дзяўчаты – праз цікавыя гісторыі з лірычным падтэкстам даносілі добрым людзям легенды беларускай зямлі.

Прайшлі традыцыйныя гульні з гаданнямі, народнымі песнямі – важныя атрыбуты купальскіх абрадаў. Сапраўдную інтрыгу на свяце стваралі здатныя шкодзіць людзям прадстаўнікі нячыстай сілы: ведзьма і яе адданыя служкі чэрці: яны нават выканалі “Танец нечысці”. Але ў рэшце рэшт купалінкі сталі ў карагод і пазбавіліся ад нячысцікаў – і дабро перамагло ліха.

Жыхары і госці пасёлка, і ў першую чаргу маладыя людзі і дзеці, якія патрапілі на гулянне, ахвотна прычыніліся да сапраўдных скарбаў беларускай міфалогіі, ажывілі паданні пра славутую папараць-кветку – сімвал шчаслівай долі, пра купальскі агонь, якім ачышчаліся, і пра ваду, што даруе жыццё. У гэты вечар дзяўчаты, як і раней іх продкі, плялі з кветак і траў вянкі, пасля спускалі іх на ваду з надзеяй, што хутка ўбачаць сваіх суджаных.

Купальскую ночку зэльвенская моладзь сустракала з верай у тое, што іх сэрцы – гарачыя ад купальскага кастра, рукі – чыстыя ад купальскай вады, ногі – дужыя ад купальскіх карагодаў, у будучым  паспрыяюць адзін аднаго паважаць, бацьку з маці не забываць…

Яркія ноткі сучаснасці і без таго змястоўнай праграме надалі атракцыёны і юбілейны шоу-фестываль фарбаў на зэльвенскай зямлі “10 гадоў мы з вамі!”. Працавалі фудкорт, гандлёвыя рады. А канцэрт з удзелам мясцовых артыстаў і дыскатэка сталі добрым завяршэннем незвычайнага летняга вечара, які ўтрымлівае ў сабе шмат невядомага і загадкавага.

Любоў ШЭЙКА

Интересные и актуальные новости Зельвенского района в нашем  Telegram-канале.  Подписывайтесь по ссылке!