Ориентир в мире книг

Сёння бібліятэкі знаходзяцца ў стадыі пераасэнсавання сваёй дзейнасці: змяняюцца традыцыйныя бібліятэчныя тэхналогіі, характар узаемадзеяння з рознымі сацыяльнымі групамі.

У склад Зэльвенскай цэнтра-лізаванай бібліятэчнай сістэмы ўваходзяць 13 бібліятэк: цэнтральная раённая, дзіцячая раённая і 11 сельскіх.

Да паслуг жыхароў раёна прадстаўлены больш за 300 тысяч выданняў бібліятэчнага фонду, якімі карыстаюцца звыш 9 тысяч чытачоў.  

Акрамя агульнадаступных відаў паслуг, бібліятэкі аказваюць больш за 30 платных. Найбольш запатрабаваны сярод насельніцтва такія іх віды, як выдача кніг з камерцыйнага фонду і перыядычных выданняў з чытальнай залы, ксеракапіраванне і сканіраванне матэрыялаў, падбор літаратуры па вызначанай чытачом тэматыцы і інш.

У бібліятэках ЦБС налічваецца 16 камп’ютараў, 5 шматфункцыянальных апаратаў, 9 прынтараў, сканар і капіравальны апарат. Усяго камп’ютарызавана 11 бібліятэк, якія  маюць інтэрнэт і электронную пошту. 

Адна з самых наведваемых культурных устаноў пасёлка – цэнтральная раённая бібліятэка, дзе штогод праводзіцца больш за 40 масавых мерапрыемстваў. Асаблівае месца займаюць пасяджэнні аматарскага аб’яднання “Ліра”, на якіх чытачы знаёмяцца з вядомымі паэтамі і пачынаючымі аўтарамі. Плённа працуе пры бібліятэцы клуб “Восень жыцця” для аматараў кнігі сталага ўзросту.

Традыцыйным стала свята “Зэльвенскія сакавіны”, на якім свае творчыя здабыткі прадстаўлялі паэты А. Елісеенкаў, А. Таболіч, У.Марук, У.Дранько-Майсюк, М.Скобла, Р.Малахоўскі, празаік Б.Сачанка, намеснік рэдактара часопіса “Вясёлка” М.Маляўка, галоўны рэдактар часопіса “Полымя” М.Мятліцкі і іншыя таленавітыя асобы.

У бібліятэцы працуюць людзі, якія добра ведаюць і любяць сваю справу. Гэта калектыў аддзела абслугоўвання і інфармацыі (загадчык В.М.Масюк), аддзела бібліятэчнага маркетынгу (загадчык С.М.Мацкевіч), бібліятэкары аддзела камплектавання і інфармацыі Я.І.Цярэшка і В.С.Панасік. 

Дзіцячая раённая бібліятэка – гэта абанементная зала для наведвальнікаў малодшага і старэйшага ўзросту, чытальная зала з даведачным фондам. Свае паслугі прадстаўляе інфармацыйна-адукацыйны цэнтр. Прыцягненню новых чытачоў садзейнічаюць разнастайныя мерапрыемствы, што ладзяцца ў бібліятэцы: літаратурныя гульні, вечарыны, конкурсы. Працуе лялечны гурток, аматарскія аб’яднанні “Чамучкі” і  “Вясёлка”.  У сценах Дома кнігі не раз пабывалі творчыя асобы, вядомыя пісьменнікі і рэдактары часопісаў.  

З дапамогай загадчыка бібліятэкі М.Я.Сітко, бібліятэкараў Р.А.Навасад, А.І.Мазалеўскай дзеці знаёмяцца з навінкамі літаратуры, пашыраюць свой кругагляд.

Непасрэдны ўдзел у жыцці вёскі прымаюць сельскія бібліятэкі, якія вядуць плённую работу па зборы, накапленні, зберажэнні краязнаўчых матэрыялаў, падтрымліваюць сувязі з вядомымі ўраджэнцамі краю.