Праздник талантов, гармонии и красоты

Дзіцячая школа мастацтваў – гэта ўстанова, дзе на працягу 5 або нават 7 гадоў дзеці вучацца іграць на музычным інструменце, прыгожа танцаваць, выражаць свой унутраны свет з дапамогай алоўка і фарбаў.  Гады навучання запамінаюцца цікавымі сустрэчамі, хвалюючымі выступленнямі, арыгінальнымі выставамі…  Аб гэтым і не толькі гаварылі хлопчыкі і дзяўчынкі, якім 25 мая на выпускным балі былі ўручаны пасведчанні аб заканчэнні Зэльвенскай дзіцячай школы мастацтваў. Сёлета тут  адбыўся самы  вялікі за ўсю гісторыю існавання школы выпуск: установу закончылі 53 навучэнцы (29 – музычнага, 18– харэаграфічнага, 6 – мастацкага аддзяленняў), з якіх 13 – на “выдатна”.

  У гэты радасны і адначасова сумны дзень юнакоў і дзяўчат павіншавала і ўручыла атэстаты дырэктар школы Вольга Генюш. “Вы таленавітыя і адораныя, – адзначыла Вольга Яўгеньеўна, звяртаючыся да выпускнікоў. – Вынікі вашай працы – гэта шматлікія перамогі на раённых, абласных і рэспубліканскіх конкурсах. Вы актыўныя ўдзельнікі кожнага святочнага мерапрыемства, якое праходзіць у пасёлку. Дэманструйце свае дасягненні, працуйце над сваім удасканаленнем і далей”.  

Да цёплых віншаванняў далучылася начальнік аддзела культуры райвыканкама Галіна Раманчук, якая адзначыла, што “атрымаць дакумент аб адукацыі школы мастацтваў – гэта вялікі гонар, і ён выпадае не кожнаму”. Галіна Мікалаеўна падзякавала выпускнікам, якія прымалі актыўны ўдзел у грамадскім жыцці раёна, прадстаўлялі школу на конкурсах і фестывалях, сваімі дасягненнямі праславілі Зэльвеншчыну далёка за яе межамі і ўручыла ім граматы аддзела культуры. За актыўны ўдзел у грамадскім жыцці школы Па-дзячныя лісты былі ўручаны бацькам выпускніц Анастасіі Жыдок і Юліі Попка.  

Ад імя бацькоў са словамі віншаванняў дзецям і ўдзячнасці настаўнікам выступіла Святлана Жабрун. “Свет мастацтваў стаў для вас казачным, таму што вы навучыліся яго разумець, успрымаць і жыць з ім і ў ім, – з такімі словамі звярнулася да выпускнікоў Святлана Іосіфаўна. – Цяпер вам неабходна зберагчы  набытыя за гады вучобы навыкі і старацца іх развіваць”.

Сцэна была адкрыта для ўсіх жадаючых перадаць свае пачуцці праз мастацтва. Прысутныя прымалі віншаванні ад дзіцячага духавога аркестра (дырыжор – Анатолій Абухоўскі), дзіцячага хору (кіраўнік – Алена Мурына). Прыгожыя мелодыі ў выкананні ансамбляў дамрыстаў і гітарыстаў, цымбалістаў, саксафаністаў, кубінскае ча-ча-ча, энергічны чарльстон у рухах танцораў  – усё пераплялося ў адзіны яркі канцэртны ўзор. Сапраўдным упрыгожаннем свята стала выступленне фальклорнага ансамбля “Медуніца”, дыпламантаў рэспубліканскага і абласнога конкурсаў Аляксандры Тарасевіч і Антона Александровіча, і саміх выпускнікоў. Яны выканалі свае любімыя творы, некаторыя з якіх падрыхтавалі спецыяльна да выпускнога экзамену. Заключным акордам канцэртнай праграмы стаў нумар Наталлі Капыловіч, якая пад мелодыю вальса са-брала на сцэне ўсіх тых, хто атрымаў дакумент аб атрыманні музычнай адукацыі. 

Новы вучэбны год пакажа, як павярнуліся дарогі сённяшніх выпуск-нікоў, ці збыліся іх планы. Але ўжо зараз з упэўненасцю можна сцвяр-джаць, што яны зберагуць у сваіх сэрцах гармонію музыкі, танца, фарбаў, пранясуць павагу да сваіх настаўнікаў праз усё жыццё.