Спорт — это высокие рекорды и звонкие имена

Штогод у нашай краіне ў трэцюю суботу мая адзначаецца прафесійнае свята работнікаў фізічнай культуры і спорту. Аб дасягненнях, а таксама перспектывах развіцця фізкультуры і спорту ў раёне наша гутарка з начальнікам аддзела фізічнай культуры, спорту і турызму райвыканкама     І. І. Мацюком.

– Іван Іванавіч, што сёння сабой уяўляе фізкультурна-спартыўнае жыццё раёна і з якімі дасягненнямі падышлі зэльвенскія фізкультурнікі і спартсмены  да свайго прафесійнага свята?

– Наш аддзел аб’ядноўвае дзіцяча-юнацкую спартыўную школу, фізкультурна-аздараўленчы цэнтр, а таксама 35 калектываў фізкультуры, 23 з якіх створаны на прадпрыемствах і ў арганізацыях, 12 – ва ўстановах адукацыі. З пачатку года праведзена больш за 20  спартыўна-масавых спаборніцтваў і фізкультурна-аздараўленчых мерапрыемстваў, у якіх прынялі ўдзел больш за дзве тысячы жыхароў раёна. І гэта не ўлічваючы выступленні юных спартсменаў з устаноў адукацыі і выхаванцаў СКК “Фудасін”. Дарэчы, апошнія на рэспубліканскіх і міжнародных спаборніцтвах заваявалі больш за 200 узнагарод. 

Найбольшай папулярнасцю сярод насельніцтва карыстаюцца такія віды спорту як лёгкая атлетыка, валейбол, міні-футбол, стрытбол, настольны тэніс. Традыцыйна многія зэльвенцы ўдзельнічаюць у  лыжных гонках “Зэльвен-ская лыжня”, а летам – у  раённай спартакіядзе  сярод арганізацый, прадпрыемстваў і сельсаветаў.  

Добра  зарэкамендавалі сябе гандбалісты ДЮСШ (хлопчыкі і дзяўчынкі 1997–1999 гадоў нараджэння), выхаванцы трэнераў Віктара  Вінніка, Міхаіла Жыдка і Міхаіла Міхуты.

На абласных і рэспубліканскіх спаборніцтвах па бегу на доўгія дыстанцыі вызначыўся Арцём Калачоў з гімназіі №1. Прызёрамі абласных спаборніцтваў па лёгкай атлетыцы сталі Ніна Ахраменя і Ала Сідорык (Елкаўская СШ, трэнер Іван  Літвінчык), Хрысціна Рудая (Князеўская гімназія, трэнер Ганна Каленка). Другое месца  ў занальных спаборніцтвах па валейболе ў праграме спартакіяды “Каласок” сярод дзяўчынак 1997–1999 гадоў нара-джэння заняла зборная каманда раёна, у склад якой увайшлі міжэрыцкія, елкаўскія, дзярэчынскія і князеўскія валейбалісткі. 

– Якімі спартыўнымі перамогамі нашых землякоў мы можам ганарыцца?

– Спартыўную славу Зэльвен-шчыне прынеслі былыя вучні  ДЮСШ – гандбалістка, член Нацыянальнай зборнай і вядучы ігрок каманды “Гараднічанка”, майстар спорту Наталля Васілеўская, майстры спорту лёгкаатлеты Надзея Даражук і Алег Копач, кандыдат у майстры спорту Алена Кашчыц, былая выхаванка клуба “Фудасін”, неаднаразовая чэмпіёнка свету, міжнародных і рэспубліканскіх спаборніцтваў па шатакан каратэ-до, уладальніца чорнага поясу, майстар спорту Наталля Саўчанка. 

– Аднак не ва ўсіх зэльвенцаў ёсць здольнасці, каб прафесійна займацца спортам. Як наладжана дзейнасць аддзела па арганізацыі работы сярод спартсменаў-аматараў?

– Далучыцца да прыхільнікаў здаровага ладу жыцця і выбраць для сябе занятак па душы можа кожны жадаючы, незалежна ад узросту (зразумела, пры адсутнасці медыцынскіх паказанняў). Галоўнае, каб была зацікаўленасць. Для правядзення фізкультурна-аздараўленчай і спартыўна-масавай работы ў раёне ёсць добрая спартыўная база: стадыён “Колас”, фізкультурна-аздараўленчы цэнтр, у якім абсталявана трэнажорная зала. Кожны жадаючы пад кіраўніцтвам вопытных інструктараў можа заняцца атлетычнай гімнастыкай, настольным тэнісам, аэробікай. У кожнай агульнаадукацыйнай установе абсталяваны спартзалы і стадыёны. У Зэльве дзейнічаюць аматарскія    каманды па  валейболе і футболе.

– Іван Іванавіч, якія спартыўныя калектывы вы адзначылі б у ліку лепшых?

– Паспяхова спраўляюцца са сваімі абавязкамі і творча падыхо-дзяць да справы інструктары-метадысты фізкультурна-аздараўленчага цэнтра Кацярына Кабіцкая і Дзмітрый Яўхута. Вялікі ўклад у выхаванне юных спартсменаў уносяць трэнеры ДЮСШ Ганна Каленка, Міхаіл Міхута, Віктар Віннік  і Аляксандр  Урбановіч. Плённа працуюць настаўнікі фізічнага выхавання Уладзімір Сай і Іван Лапата (СШ №2), Святлана Сай (СШ №3), Віктар Бурак (Галынкаўская СШ), Аляксандр Бурдук (Міжэрыцкі дз/с-СШ), Іван Літвінчык (Елкаўская СШ). Сярод працоўных калектываў, якія сябруюць са спортам, варта адзначыць прадпрыемства меліярацыйных сістэм, цэнтральную раённую бальніцу, аддзел адукацыі, РУП ЖКГ, МПМК-148, Сынкавіцкі сельсавет, філіял “Князева” і інш. 

– Вашы пажаданні работнікам сістэмы фізічнай культуры і спорту раёна, усім прыхільнікам здаровага ладу жыцця з нагоды прафесійнага свята.

– Шануйце і любіце спорт! Ён – наша здароўе, бадзёрасць і цудоўны настрой!