Свята малака адзначылі ў аграгарадку Крывічы

На Зэльвеншчыне лета – час фестываляў і актыўных мерапрыемстваў на прыродзе. Практычна ніводныя выхадныя сёлета не абыходзяцца без свят у аграгарадках. Пры гэтым іх арганізатары – работнікі культуры – імкнуцца прыдумаць нейкую сваю фішку, маўляў, гэта вы можаце пабачыць толькі ў нас.

«Піце, госці, малако, будзеце здаровыя!» – так гучаў дэвіз брэндавага мерапрыемства,  якое сёння прайшло ў Крывічах. Незвычайная ўрачыстасць сабрала ўсіх жыхароў і гасцей аграгарадка на свята малака.

Калі ў двары карова – будзе ежа на стале. Менавіта такімі словамі адкрываў свята малака старшыня Дзярэчынскага сельсавета Аляксандр Белякала.

З народнай мудрасцю не паспрачаешся. Канечне, у апошнія гады на вясковых падворках малочнай жывёлы прыкметна паменшылася. Але па колькасці буронак (40!) крывіцкія жыхары займаюць першае месца не толькі ў сельсавеце, але і ў раёне. Так, у гаспадарцы Касенкаў аж 19 кароў, Кацярына Мамедава і Яўгеній Ракевіч ўтрымліваюць 14. А значыць, што і хатняя вытворчасць гэтага каштоўнага прадукту ў Крывічах, канечне, не спынілася: малако тут любяць, а самае галоўнае, ведаюць, якой нялёгкай працай яно здабываецца.

Аб любімым з дзяцінства напоі ў час свята спявалі песні і чыталі вершы, спрабавалі прыгатаваныя з яго пачастункі і, вядома, узнагароджвалі тых, дзякуючы каму карысны прадукт з’яўляецца на стале.

За найбольшую колькасць літраў здадзенага малака ўзнагароду атрымаў Аляксей Касенка. А самая высокая тлустасць малака ў рагулі, якая ўтрымліваецца на падворку Кацярыны Мамедавай. Буронка Ганны Лясоты перамагла ў намінацыі “Самы высокі ўдой”. Дарэчы, спонсарам грашовых прэмій для малаказдатчыкаў выступіў дырэктар прыватнага прадпрыемства “Честный выбор” Іван Ляонаў.

Прызы ад арганізатараў мерапрыемства таксама атрымалі гаспадары самай сімпатычнай, жвавай і сытай каровы, а таксама рагулі, у якой самыя вялікія рогі. А самі буронкі красаваліся на фотавыставе.

Гасцей свята частавалі прысмакамі, якія мясцовыя гаспадыні прыгатавалі з малака – сырам, блінамі, пірагамі…

Дарэчы, мясцовыя жанчыны не толькі ўмела даглядаюць сваю жывёлу, але і гатуюць з малака смачныя стравы. Багата накрыты на святочнай плацоўцы стол адлюстроўваў іх кулінарныя таленты. Прысутных частавалі сырам, блінамі, пірагамі з тварагом і нават тортам. Які, дарэчы, у якасці падарунка прэзентавала дзяржпрадпрыемства “Бародзічы”.

Зразумела, толькі гэтым свята не абмяжоўвалася. Бо, як кажуць, не хлебам адзіным… Усе жадаючыя маглі паўдзельнічаць у конкурсах на веданне малочных страў і клічак кароў, выкананне частушак па тэматыцы свята, найхутчэйшае збіванне масла. А яшчэ прадстаўлялася магчымасць стаць першакласным даяром.

Святочны настрой удзельнікам мерапрыемства стваралі артысты раённага цэнтра культуры, народнай эстраднай студыі «Рэтра», якія падрыхтавалі цікавую канцэртную праграму для аграгарадкоўцаў. Гучалі пранікнёныя песні пра малую радзіму, сельскіх працаўнікоў, жыццё ў вёсцы.

Станоўчымі эмоцыямі была напоўнена дзіцячая пляцоўка. Заняткі па гусце тут маглі знайсці і падлеткі, і малышня: разнастайная забаўляльная праграма ад работнікаў раённай бібліятэкі не давала сумаваць нікому.

Адным словам, Крывічы добра прынялі нас на свяце малака, а да наступнага мерапрыемства рыхтуецца клубная ўстанова аграгарадка Князева. Там тэмай дня будзе мясцовы парк і звязаныя з ім таямніцы. Што ж, будзем чакаць сустрэчы з нецярпеннем!

Тэрэза КАВАЛЕВІЧ

Интересные и актуальные новости Зельвенского района в нашем Telegram-канале. Подписывайтесь по ссылке!