У Каралiн па настрой. Брэндавы фестываль «Перазвон талентаў» сабраў шмат прыхільнікаў народнай творчасцi

Гучна, ярка, у цёплай сяброўскай атмасферы прайшоў у аграгарадку фальклорны фестываль “Перазвон талентаў”

У мінулую суботу Каралін ператварыўся ў каляровую святочную пляцоўку пад адкрытым небам. Ужо шмат гадоў сюды з’язджаюцца таленавітыя людзі з ўсіх куточкаў Зэльвеншчыны– культработнікі, аграрыі, педагогі, бухгалтары, работнікі гандлю, а таксама моладзь і школьнікі. Паступова брэндавае мерапрыемства аграгарадка перарасло ў раённы фестываль фальклору – сапраўднае свята ў народных традыцыях са спевамі, гульнямі, тэатралізаванымі дзеямі.

У адным месцы арганізатары мерапрыемства сабралі лепшыя ўзоры народнай творчасці. На тэрыторыі мясцовай установы культуры разгарнуліся выставы творчасці таленавітых землякоў і старажытных прылад працы, якімі карыс-
таліся нашы бабулі і дзядулі. Працавалі майстар-класы аддзела рамёстваў аграгарадка Дзярэчын. А прыхільнікі песеннай творчасці маглі зарадзіцца добрым настроем ад блізкіх сэрцу беларускіх спеваў. Цудоўнаму настрою спрыяла не толькі вясёлая музыка, але і сонечнае надвор’е, і лагодныя ўсмешкі на тварах людзей, прыгожа і па-святочнаму апранутых.

Гучнымі апладысментамі ўсе прысутныя віталі калектывы мастацкай самадзейнасці з Міжэрыч, Цяглевіч, Караліна, Елкі, Галынкі, Дзярэчына, Бародзіч, Князева, а таксама ўзорны фальклорны калектыў “Кашалёўская скарбонка”. “Перазвон талентаў” аб’яднаў зэльвенцаў розных узростаў, якія з жаданнем імкнуліся падзяліцца скарбамі фальклорнага мастацтва, прапаноўвалі зноў і зноў дакрануцца да найбольш патаемных крыніц нашай спадчыны.

Фестывальную праграму адкрыла дэфіле народных строяў мінулых часоў нашых землякоў з розных населеных пунктаў Зэльвеншчыны. Як адзначыла вядучая, дэкор беларускіх касцюмаў сугучны з пяшчотнай песняй, мяккай пластыкай народнага танца, строгай велічнасцю драўлянага дойлідства… Клубнымі ўстановамі былі прадстаўлены ўбранні маладых дзяўчат, жанчын сярэдняга ўзросту, сталых кабет і, канечне ж, мужчын. Праз дзясяткі гадоў некаторыя элементы касцюмаў зноў пабачылі свет на фальклорным свяце, каб у чарговы раз даказаць: строй народны – заўсёды модны.

У тым, што зэльвенская зямля – унікальны куточак Беларусі са сваёй самабытнай культурай, старажытнымі звычаямі і гісторыяй, гледачы ўпэўніліся падчас агляду-конкурсу абрадаў “Фарбы спадчыны маёй”, які адкрыў сапраўдную скарбонку самых разнастайных духоўных каштоўнасцей нашага краю. Калядаванне, хаджэнне валачобнікаў, замес вясельнага караваю, сустрэча маладога, зялёныя святкі, закліканне дажджу, ваджэнне куста, зажынкі… Усе прадстаўленыя абрады прайшлі з элементамі моднага сёння інтэрактыву.

Ніводнае выступленне не пакінула гледачоў абыякавымі, кожны абрад кранаў да глыбіні душы, а кожная песня знаходзіла водгук у людзей і суправаджалася апладысментамі, у якіх зліваліся захапленне і ўдзячнасць. Ды ці магло быць інакш, калі народная творчасць закранае самыя патаемныя струны сэрца?! Слухаеш – і, здаецца, жыццё праходзіць перад вачыма… Да позняга вечара
ўдзельнікі свята захапляліся канцэртнай праграмай, спявалі і танцавалі.

Што датычыцца танцаў, то іх таксама было шмат. Спачатку гасцям свята прапанавалі папуры народных беларускіх у выкананні нашых землякоў Паўла Скубы і Яны Ляўданскай. Выступ-
ленне дуэта выклікала шквал апладысментаў. А пасля майстар-класа па побытавых танцах ад загадчыка аддзела па арганізацыі культурных мерапрыемстваў цэнтра культуры і народнай творчасці Ліліі Кучаравай усе гледачы дружна кінуліся ў скокі. Кадрыля, падыспань, нарэчанька, полька, вальс… Вяскоўцы старанна паўтаралі за артыстамі рухі і атрымлівалі ад гэтага асаб-
лівае задавальненне. Лепшую пару выбралі ў час танцавальнага этнамарафону.

У тэму
У рэдакцыю патэлефанавалі жыхары аграгарадка Каралін, каб падзякаваць арганізатарам фестывалю “Перазвон талентаў” за фальклорнае свята і нераўнадушныя адносіны да народнай спадчыны. Пакуль будуць на нашай зямлі такія апантаныя людзі, у нашай краіны будзе будучыня, упэўнены вяскоўцы.

Інтрыгуючым момантам мерапрыемства стала аб’яўленне пераможцаў агляду-конкурсу абрадаў. Першае месца журы прысудзіла культработнікам з Елкі, другое – з Галынкі і Цяглевіч, трэцяе – з Бародзіч. Граматамі таксама адзначаны народныя ўмельцы Ганна Пазняк, Ірына Паляшчук, Людміла Херкова, Марыя Чарневіч, Аляксандр Галянда і найбольш актыўныя ўдзельнікі фальклорнага фестывалю.

Ад прадзедаў спакон вякоў нам засталася спадчына… Багатая, прыгожая, непаўторная – наш гонар, наша сучаснае аблічча і наша будучае. Спадчына, якую нераўнадушныя зэльвенцы збіра-
юць па крупіцах і імкнуцца захаваць. І самае галоўнае, што побач з вопытнымі майстрамі, убеленымі сівізною, працуе моладзь. Людзі, традыцыі, наша родная зямля – гэта і ёсць наш сапраўдны, самы дарагі скарб.

Тэрэза КАВАЛЕВІЧ

Сектар культуры райвыканкама шчыра ўдзячны за спонсарскую дапамогу ў правядзенні фестывалю
кіраўніку дзяржпрадпрыемства “Галынка” Яўгенію Васільевічу Грэцкаму.

Интересные и актуальные новости Зельвенского района в нашем  Telegram-канале.  Подписывайтесь по ссылке!