Узнагароды – зноў “залатыя”. Узорны танцавальны ансамбль “Зальвяначка” дастойна прадставіў Беларусь у Маскве

Узорны танцавальны ансамбль “Зальвяначка” нядаўна вярнуўся з XXX юбілейнага Міжнароднага фестывалю-конкурсу «Саюз талентаў Расіі». Дружная каманда пазітыўных і энергічных зэльвенцаў двойчы стала лаўрэатам І ступені.

Любы канцэрт для “Зальвяначкі” заўсёды свята, якое выклікае хваляванне і радасць. А да мерапрыемства, што праходзіла ў Калоннай зале Дома Саюзаў пры падтрымцы Дзяржаўнай думы Расійскай Федэрацыі, дзеці рыхтаваліся асабліва старанна. І на фестывальны Алімп іх прывяло бездакорнае выкананне беларускага танца “Круцёлка” і фальклорнага – “Грабаўская кадрыля”. Фактычна ўдзел у такім прэстыжным конкурсе стаў самай значнай падзеяй у сёлетнім культурным календары ансамбля.

Сапраўды, у майстэрстве танцораў ёсць штосьці неверагоднае. Калі раней “Зальвяначка” ў мяне асацыіравалася з Зэльвай, то хутка, мяркую, будзе мець дачыненне да прафесіяналаў прэміум-класа. Гэта не жартачкі: пакарыць Маскву, заслужыўшы прызнанне ўплывовага журы і шырокага расійскага гледача.

Як адзначыў кіраўнік ансамбля Цімафей Жукоўскі, тыя тры з паловай хвіліны, адведзеныя на выступленне, праляцелі незаўважна:
– Імгненнае пераўвасабленне, нацыянальныя касцюмы, маляўнічыя замалёўкі, адточаныя рухі, музыка і энергія, што зыходзіла ад юных артыстаў, – усё ўражвала гледачоў. А колькі яшчэ было цёплых слоў і апладысментаў, потым і віншаванняў ад родных ды ўвогуле прыхільнікаў нашай творчасці!..

Маючы пэўны вопыт удзелу ў міжнародных конкурсах за мяжой, таленавітыя вучні, якія трапілі ў Расію ўпершыню, не разгубіліся, а раскрылі моц і прывабнасць танцавальнага мастацтва, паказалі ўсё, на што здольныя. Прадстаўнікі журы, па словах Цімафея Пятровіча, ацанілі ў кожнай рознаўзроставай групе як добрае валоданне тэхнікай, выдатнае выкананне камбінацый, так і накіраванасць на вынік. Больш таго, падзякавалі адзіным удзельнікам-беларусам за захаванне і папулярызацыю народнай культурнай спадчыны. Належна была ўспрынята дзіўная па прыгажосці харэаграфічная пастаноўка з беларускім, а ў старэйшай групе – з зэльвенскім каларытам.

– Самаадданасць, працавітасць плюс талент дазваляюць нашым дзецям не проста падцвярджаць свае здольнасці, а ўзыходзіць на новыя вяршыні, – прадоўжыў Цімафей Жукоўскі. – Між іншым, тут спрацавала творчае ўзаемадзеянне з народным ансамблем народных інструментаў “Калаж”, які забяспечыў якасную фанаграму для ўдзелу ў канцэртнай праграме.

Сапраўдны поспех прыйшоў дзякуючы тандэму прафесіяналаў – харэографа Цімафея Жукоўскага і канцэртмайстра Пятра Кукаловіча, паўсядзённай рабоце выкладчыкаў школы мастацтваў з вучнямі, іх бацькамі. Апошнія з поўным разуменнем адносяцца да працэсу ўдасканалення “Зальвяначкі”. Па меркаванні тых, хто ўвайшоў у групу падтрымкі, пачуцці зашкальвалі і была адзіная гордасць за дзяцей і паважаных настаўнікаў.
– Для мяне абсалютная перамога вучняў стала прыемнай нечаканасцю. У дачыненні да маскоўскага фестывалю я спадзяваўся як мінімум на 3-е месца. А ў рэальнасці атрымалі вось які рэзультат. Ды і мясцовую публіку ўразіла тое, што вочы беларусаў літаральна іскрыліся шчасцем: наша “Зальвяначка” – свая ў стыхіі танца, – падзяліўся Цімафей Пятровіч.

Дарэчы будзе прыгадаць агульнавядомы выраз: геніі з неба не падаюць, яны павінны мець магчымасць развівацца. У свеце гэтага яшчэ адна істотная рэмарка ад вопытнага педагога:
– Хочацца падзякаваць за падтрымку нашым спонсарам, якія паспрыялі камфортным гастролям, – дырэктару дзіцячай школы мастацтваў Вользе Генюш, загадчыку сектара культуры раённага выканаўчага камітэта Галіне Раманчук, кіраўнікам фермерскіх гаспадарак “Верас” Міхаілу Макею, “Даліна Смаку” – Аляксею Яўлашу, прыватнага прадпрыемства “Умная химия” Аляксею Глушэню, а таксама бацькам канкурсантаў.

“Куды паедзем у наступны раз?” – першае і даволі лагічнае пытанне ад лёгкіх на пад’ём удзельнікаў “Зальвяначкі” пасля экскурсіі па сучаснай Маскве. Для ўзорнага ансамбля кожная падобная паездка не толькі новы каштоўны вопыт, новыя танцы, новыя гарады. Гэта і новыя знаёмствы, якія звычайна перарастаюць у плённае творчае супрацоўніцтва. А калі справа па душы, цікавыя праекты не за гарамі.

Любоў ШЭЙКА

Интересные и актуальные новости Зельвенского района в нашем Telegram-канале. Подписывайтесь по ссылке!