Зарубежное турне Зельвенского «Коллажf»

Ансамбль народных інструментаў “Калаж” у складзе  педагогаў дзіцячай школы мастацтваў добра вядомы не толькі зэльвенцам. На працягу свайго існавання гэты музычны калектыў неаднаразова радаваў гледачоў на абласных і нават рэспубліканскіх фестывалях і канцэртах. У рэпертуары – класічная, народная музыка, творы сучасных кампазітараў. Нязменным кіраўніком калектыву з’яўляецца таленавіты музыкант Дзмітрый Іваноў. 

Сёлета “Калаж” упершыню зрабіў творчую паездку ў поль-скі горад Старгард-Гданьскі, які знаходзіцца непадалёку ад Балтыйскага мора. Выступленне зэльвенскіх артыстаў было цёпла сустрэта польскай публікай. 

– Запрашэнне прыняць удзел у святочным канцэрце, які праходзіў у рамках Дня горада Старгард-Гданьскі для ўсіх нас стала радаснай падзеяй, – дзеліцца ўражаннямі дырэктар дзіцячай школы мастацтваў і ўдзельніца ансамбля Вольга Генюш. – У гэтым нам аказаў садзеянне зэльвенскі прадпрымальнік Анатолій Вярстак, які даўно супрацоўнічае з дзелавымі людзьмі гэтага горада. 

Вядома, начальніку аддзела ідэалагічнай работы, культуры і па справах моладзі Галіне Раманчук, мастацкаму кіраўніку Дзмітрыю Іванову і ўсім артыстам ансамбля было няпроста прыняць рашэнне наконт такой далёкай паездкі. Аднак сумеснымі намаганнямі арганізацыйныя пытанні былі паспяхова вырашаны, і артысты выехалі ў першае замежнае турнэ. 

У Старгард-Гданьскім зэльвенцаў гасцінна сустрэлі арга-нізатары святочных мерапрыемстваў. Беларускім гасцям была прапанавана насычаная культурная праграма: экскурсіі па гістарычных мясцінах горада, канцэрты і цікавыя сустрэчы.

 На час святочных мерапрыемстваў гэты прыгожы польскі гарадок ператварыўся ў сапраўднае суквецце разнастайных талентаў. Тут можна было сустрэць асобных артыстаў і творчыя калектывы, якія працуюць у розных музычных жанрах і накірунках. Таму зэльвенцы маглі ўбачыць і пераняць шмат цікавага і карыснага для сябе. 

 Як адзначыла ў час нашай размовы Вольга Генюш, арганізацыйны ўзровень святочных мерапрыемстваў быў выдатным. Мясцовыя спецыялісты ў сферы шоу-бізнесу маюць значны вопыт у іх правядзенні.

На галоўнай канцэртнай летняй пляцоўцы, дзе разам з зэльвенцамі выступалі многія самадзейныя калектывы гэтага горада і госці, панавала цудоўная сяброўская атмасфера. Нашы музыканты падрыхтавалі цікавую і разнастайную праграму, у якую ўключылі музычныя творы кампазітараў розных краін. Але пераважная большасць з іх – беларускія, а таксама песні ў апрацоўцы таленавітага зэльвенскага музыканта Раісы Малахоўскай “Мужанёк-памочнік“, “Думаў жаніцца”, “Паехаў мой мілы”, “Голуб галубку цалуе”, “Забава”, “Мы вам жадаем”. Віртуозна ігралі музыканты ансамбля Дзмітрый Іваноў, Вольга Генюш, Таццяна Саладуха, Уладзімір Перавалаў, Наталля Шостак, Наталля Александровіч, Таццяна Кароза, Віктар Жук. Прыгожа выконвала песні салістка Валянціна Маркевіч. Жывая і яскравая манера выканання, высокі ўзровень майстэрства, жаданне данесці да слухачоў увесь спектр эмацыянальнага зместу музычных твораў, шчырасць уразілі  польскую публіку, і таму плошча пастаянна грымела ад дружных апладысментаў і воклічаў «брава!». 

Пасля выступлення на галоўнай пляцоўцы ансамбль даў не запланаваны канцэрт на адной з вулічных пляцовак горада. Гараджанам прыйшлася даспадобы наша “Катюша”, польская песня “Мела матка сына” і іншыя. І зноў гучалі бурныя апладысменты, і зноў музыкантам прыходзілася выконваць на біс мелодыі, якія палюбіліся польскім гледачам.  

За сваё выступленне калектыў атрымаў падзяку і памятныя падарункі ад арганізатараў свята, а таксама запрашэнне зноў бачыць зэльвенцаў у гасцях. 

Затым была арганізавана паездка ў Сопат і Гданьск, адбылося таксама знаёмства з архітэктурнымі і гістарычнымі славутасцямі гэтых мясцін. Зэльвенскія артысты не ўпусцілі магчымасці, каб не пакупацца ў Балтыйскім моры. У кожнага засталіся прыемныя ўражанні ад такой цудоўнай паездкі. 

Як адзначыў кіраўнік ансамбля “Калаж” Дзмітрый Іваноў, такія гастролі, безумоўна, не толькі спрыяюць павышэнню прафесійнага майстэрства артыстаў, але і садзейнічаюць фарміраванню станоўчага іміджу нашай краіны. Калектыў ансамбля народных інструментаў гатовы актыўна прадстаўляць свае музычныя і культурныя набыткі за межамі краіны.