Зэльвенскія вернікі дзеляцца вялікай радасцю – Хрыстус Уваскрос!

Як і штогод, так і сёлета Вялікая субота ў хрысціян каталіцкага веравызнання перажывалася ў Таямніцы Крыжа і Ўваскрэсенні Збаўцы. На працягу дня зэльвенцы маліліся каля грабніцы Пана, а вечарам сабраліся на імшу, на якой праслаўлялі Змёртвыхпаўстанне Хрыста.

Духоўны настрой і душэўныя пачуцці аб’ядналі зэльвенцаў падчас набажэнства Вялікай Ночы. Разам перажывалі пасвянчэнне Пасхалу, Велікоднай свечкі – сімвалу Змёртвыхпаўстання Хрыста. Якая, як заўжды, пасля пасвянчэнне святаром была размешчана ў цэнтральным месцы пры алтары.

На спеў пробашча Яцэка Маркеля: “Святло Хрыстова” парафіяне тройчы дружна адказалі: “Дзякуем Богу!”. І ў думках падзякавалі Пана за вялікі цуд, які Ён здзейсніў – перамогу жыцця над смерцю, Уваскрэсення з мёртвых.

А далей літургія Ўдзячнасці: разважанні над тымі дабротамі, якія Пан Бог дае кожнаму чалавеку. Літургія Слова – гэта надзея паводле слоў Пана: “Той, хто верыць у Мяне, нават калі памрэ, будзе жыць!”. Літургія Аднаўлення веры – дала магчымасць аднавіць Сакрамэнт Хросту.

Пасля гэтага святар благаславіў прысутных у касцёле і асвяціў ваду.

Святочнае набажэнства ўпрыгожвалі песні, у якіх праслаўляўся Хрыстус, у выкананні касцельнага хору і парафіян. Напрыканцы ўзрушана, гучна і радасна загучаў гімн “Вясёлы дзень настаў!”.

Хрысціяне, асабліва маленькія і моладзь, з хваляваннем назіралі за кожным момантам. А ў Вялікую Ноч кожны момант мае асаблівы сэнс. Адзін з іх – перанясенне Найсвяцейшага Сакрамэнту да галоўнага алтара.

І як толькі гэта адбылося ў прыгожай працэсіі вакол касцёла зэльвенцы заспявалі: “Цябе, Божа, праслаўляем!”.

Дзелячыся вялікай радасцю, ксёндз Яцэк павіншаваў вернікаў са святам і пажадаў, каб Пан Бог адорваў ласкай і міласэрнасцю кожнага чалавека, каб вера аб’ядноўвала людзей і дапамагала зберагаць згоду і мір ва ўсім свеце. Адрасаваў парафіянам Зэльвенскага раёна свой віншавальны ліст біскуп Аляксандр Кашкевіч.

Радасна вернікі віншавалі адзін аднаго, абменьваючыся словамі “Хрыстус Уваскрос! – Сапраўды Уваскрос!”.

Гэтыя словы будуць гучаць у нядзелю, падчас святочнай імшы, а таксама на працягу святочнай актавы, якую веруючыя людзі павінны ўшаноўваць і захоўваць.

Хрыстус Уваскрос! – Сапраўды Уваскрос!

Людміла ПОПКА

Интересные и актуальные новости Зельвенского района в нашем Telegram-канале. Подписывайтесь по ссылке!