Земля на перспективу

Кожны год у першую нядзелю чэрвеня меліяратары Беларусі адзначаюць сваё прафесійнае свята – Дзень меліяратара.

Запатрабаваная і неабходная праца – ператвараць зямлю ва ўрадлівыя сельгас-угоддзі, на якіх закаласуе пшаніца, зашуміць пад летнім ветрыкам сакавітая трава, пацягнецца да сонца бульба. І ўсё гэта – дзякуючы працы меліяратараў, якую простай не назавеш. Прадстаўнікі гэтай прафесіі павінны ўмець выкарыстоўваць найноўшыя дасягненні, быць тэхнічна адукаванымі, дальнабачнымі. Больш таго, адрознівацца вынослівасцю, загартоўкай, паколькі ім даводзіцца працаваць на адкрытым паветры, у любое надвор’е і ў любую пару года.  

Напружаныя будні

– Галоўным накірункам нашай дзейнасці застаецца аднаўленне меліярацыйных зямель, – адзначыў у ходзе гутаркі дырэктар прадпрыемства меліярацыйных сі-стэм Канстанцін Бердніковіч. – У структуры сельгасугоддзяў на тэрыторыі нашага раёна меліяраваныя землі займаюць больш за 15 тыс. гектараў. Сёлета вядзецца рэканструкцыя зямель на меліярацыйных аб’ектах “Калінаўка”, “Міжэрычы–Бязводнае” (СВК “Міжэрычы”), “Ляхавічы №1” (філіял “Князева”), рамонт меліярацыйных сістэм – на аб’ектах “Зальвянка №1” і “Зальвянка №4”, аграмеліярацыя – “Зальвянка №3” і аграмеліярацыйныя мерапрыемствы на аб’екце “Бярэжкі” (СВК “Бародзічы”). Акрамя гэтага, праводзіцца комплекс работ па падтрыманні ў належным стане дзеючых меліярацыйных сістэм Зэльвеншчыны. 

ПМС – прадпрыемства шматпрофільнае, і яго вы-творчыя падраздзяленні выконваюць не толькі меліярацыйныя, але і іншыя работы: прымаюць удзел у будаўніцтве новага бульбасховішча на 3000 тон у СВК “Галынка”, спецыяльных збудаванняў на новым малочнатаварным комплексе ў СВК “Караліно”, жылога дома ў г.Бярозаўка, пракладваюць сеткі водазабеспячэння і каналізацыі да сістэмы жылых дамоў у аграгарадку Азёры Гродзен-скага раёна, рыхтуюць плошчы пад здабычу торфу на аб’екце “Верцялішкі” ў Гродзенскім раёне. Зэльвенскія меліяратары аказваюць аўтатранспартныя паслугі, займаюцца распілоўкай ле-су, пчалярствам. 

Шматпрофільная дзейнасць ПМС, праведзенае тэхнічнае пераўзбраенне, мэтанакіраваная тэндарная палітыка, прафесіяналізм калектыву, і, безумоўна, умела спланаваная арганізацыя працы спрыяюць павышэнню рэнтабельнасці прадпрыемства, а значыць –  і росту заработнай платы працаўнікоў. За чатыры месяцы бягучага года аб’ём работ і аказаных прадпрыемствам па-слуг, у параўнанні  з мінулым годам, павялічыўся на 133 %, выручка ад рэалізацыі работ – на 130 %, рэнтабельнасць – на 104 %, заработная плата – на 184%. Значная частка прыбытку накіроўваецца на ўмацаванне матэрыяльна-тэхнічнай базы і развіццё прадпрыемства, стварэнне належных умоў працы, добраўпарадкаванне тэрыторыі. Сёлета тут набылі энерганасычаныя трактары “Беларус-3022” і бульдозер Б10М, агрэгат камбінаваны Дыскапак-6,1, плугі абаротныя  ППО-8-40. 

 Ты – для калектыву, калектыў – для цябе

Адказная за ідэалагічную работу ў калектыве Жанна Світа адзначае, што складнікам гаспадарчай стратэгіі прадпрыемства стала не толькі імкненне да сучаснага ўзроўню вытворчасці, але і клопат пра работнікаў. Сацыяльная абарона тых, хто працуе ў ПМС, – гэта вельмі шырокі і прадуманы раздзел у калектыўным дагаворы. Згодна з дакументам, тут  прадугле-джаны шэраг мер маральнага і матэрыяльнага заахвочвання. Так, важкі “канверт” ад прадпрыемства атрымліваюць работнікі-юбіляры, тыя, хто адпрацаваў шмат гадоў і выходзіць на пенсію, перадавікі вытворчасці. Дапамога аказваецца і ў сувязі са значнымі жыццёвымі па-дзеямі: уступленнем у шлюб, нараджэннем дзіцяці… Рэгулярна аказваецца матэрыяльная дапамога сем’ям, якія выхоўваюць дзяцей, у набыцці пуцёвак у аздараўленчы лагер “Блакітная хваля”. 

У калектыве вялікая ўвага ўдзяляецца здароваму ладу жыцця. Аб гэтым сведчаць паспяховыя выступленні спартсменаў на розных спаборніцтвах.  

Выдатныя вынікі – гэта працавітыя людзі

Дырэктар ПМС Канстанцін Бердніковіч пастаянна пад-крэслівае, што высокія вы-творчыя паказчыкі – гэта вынік стараннай працы і добрасумленнага стаўлення да сваіх абавязкаў работнікаў прадпрыемства. Сёння тут працуюць 147 чалавек. Калектыў пастаянна папаўняецца маладымі кадрамі: на працу ў ПМС прыходзяць выпускнікі вышэйшых і сярэдніх спецыяльных навучальных устаноў, якія хутка ўключаюцца ў працу. Адказнымі работнікамі зарэкамендавалі сябе маладыя спецыялісты Сяргей Казленя, Дзмітрый Камякевіч, Андрэй Кедала, Віталій Казловіч, Вольга Пракопчык і Алена Сідаровіч. Яны з усёй сур’ёзнасцю пераймаюць вопыт старэйшага пакалення меліяратараў. З першых дзён стварэння арганізацыі тут працуе прараб Леанід Юшчык. За сваю добрасумленную работу ён узнагароджаны нагрудным знакам “Ганаровы меліяратар”. Такой жа ўзнагародай першым у ПМС быў адзначаны ветэран працы, машыніст шматкаўшовага экскаватара Мікалай Траян. Усё працоўнае жыццё аддала прадпрыемству  майстар Таццяна Гойла, арганізатарскія здольнасці якой дапамагаюць работнікам вырашаць многія пытанні. Галоўны бухгалтар Галіна Кароткая – правая рука кіраўніка, і падраздзяленне, якое яна ўзначальвае, таксама робіць важкі ўклад у агульную справу. Добрасумленна працуюць машыністы экскаватараў браты Васілій і Іван Голубы, Станіслаў Малышка, бульдазерысты Юрый Сай і Аляксандр Юркевіч, трактарысты Максім Стаўбунік і Аляксандр Шчаўровіч, вадзіцелі Станіслаў Галавач і Аляксандр Мароз і многія іншыя.

– Хачу заўважыць: усё, што робяць меліяратары, – на карысць чалавека, спрыяе навядзенню парадку на зямлі, – падкрэслівае дырэктар ПМС Канстанцін Бердніковіч. – Я ганаруся сваімі работнікамі, іх адказнасцю і ўменнем вырашаць пастаўленыя задачы.